Bhaktivedanta Library


7.15.1		śrī-nārada uvāca karma-niṣṭhā dvijāḥ kecit tapo-niṣṭhā nṛpāpare svādhyāye ’nye pravacane kecana jñāna-yogayoḥ
7.15.2		jñāna-niṣṭhāya deyāni kavyāny ānantyam icchatā daive ca tad-abhāve syād itarebhyo yathārhataḥ
7.15.3		dvau daive pitṛ-kārye trīn ekaikam ubhayatra vā bhojayet susamṛddho ’pi śrāddhe kuryān na vistaram
7.15.4		deśa-kālocita-śraddhā- dravya-pātrārhaṇāni ca samyag bhavanti naitāni vistarāt sva-janārpaṇāt
7.15.5		deśe kāle ca samprāpte muny-annaṁ hari-daivatam śraddhayā vidhivat pātre nyastaṁ kāmadhug akṣayam
7.15.6		devarṣi-pitṛ-bhūtebhya ātmane sva-janāya ca annaṁ saṁvibhajan paśyet sarvaṁ tat puruṣātmakam
7.15.7		na dadyād āmiṣaṁ śrāddhe na cādyād dharma-tattvavit muny-annaiḥ syāt parā prītir yathā na paśu-hiṁsayā
7.15.8		naitādṛśaḥ paro dharmo nṛṇāṁ sad-dharmam icchatām nyāso daṇḍasya bhūteṣu mano-vāk-kāyajasya yaḥ
7.15.9		eke karmamayān yajñān jñānino yajña-vittamāḥ ātma-saṁyamane ’nīhā juhvati jñāna-dīpite
7.15.10		dravya-yajñair yakṣyamāṇaṁ dṛṣṭvā bhūtāni bibhyati eṣa mākaruṇo hanyād ataj-jño hy asu-tṛp dhruvam
7.15.11		tasmād daivopapannena muny-annenāpi dharmavit santuṣṭo ’har ahaḥ kuryān nitya-naimittikīḥ kriyāḥ
7.15.12		vidharmaḥ para-dharmaś ca ābhāsa upamā chalaḥ adharma-śākhāḥ pañcemā dharma-jño ’dharmavat tyajet
7.15.13		dharma-bādho vidharmaḥ syāt para-dharmo ’nya-coditaḥ upadharmas tu pākhaṇḍo dambho vā śabda-bhic chalaḥ
7.15.14		yas tv icchayā kṛtaḥ pumbhir ābhāso hy āśramāt pṛthak sva-bhāva-vihito dharmaḥ kasya neṣṭaḥ praśāntaye
7.15.15		dharmārtham api neheta yātrārthaṁ vādhano dhanam anīhānīhamānasya mahāher iva vṛttidā
7.15.16		santuṣṭasya nirīhasya svātmārāmasya yat sukham kutas tat kāma-lobhena dhāvato ’rthehayā diśaḥ
7.15.17		sadā santuṣṭa-manasaḥ sarvāḥ śivamayā diśaḥ śarkarā-kaṇṭakādibhyo yathopānat-padaḥ śivam
7.15.18		santuṣṭaḥ kena vā rājan na vartetāpi vāriṇā aupasthya-jaihvya-kārpaṇyād gṛha-pālāyate janaḥ
7.15.19		asantuṣṭasya viprasya tejo vidyā tapo yaśaḥ sravantīndriya-laulyena jñānaṁ caivāvakīryate
7.15.20		kāmasyāntaṁ hi kṣut-tṛḍbhyāṁ krodhasyaitat phalodayāt jano yāti na lobhasya jitvā bhuktvā diśo bhuvaḥ
7.15.21		paṇḍitā bahavo rājan bahu-jñāḥ saṁśaya-cchidaḥ sadasas patayo ’py eke asantoṣāt patanty adhaḥ
7.15.22		asaṅkalpāj jayet kāmaṁ krodhaṁ kāma-vivarjanāt arthānarthekṣayā lobhaṁ bhayaṁ tattvāvamarśanāt
7.15.23		ānvīkṣikyā śoka-mohau dambhaṁ mahad-upāsayā yogāntarāyān maunena hiṁsāṁ kāmādy-anīhayā
7.15.24		kṛpayā bhūtajaṁ duḥkhaṁ daivaṁ jahyāt samādhinā ātmajaṁ yoga-vīryeṇa nidrāṁ sattva-niṣevayā
7.15.25		rajas tamaś ca sattvena sattvaṁ copaśamena ca etat sarvaṁ gurau bhaktyā puruṣo hy añjasā jayet
7.15.26		yasya sākṣād bhagavati jñāna-dīpa-prade gurau martyāsad-dhīḥ śrutaṁ tasya sarvaṁ kuñjara-śaucavat
7.15.27		eṣa vai bhagavān sākṣāt pradhāna-puruṣeśvaraḥ yogeśvarair vimṛgyāṅghrir loko yaṁ manyate naram
7.15.28		ṣaḍ-varga-saṁyamaikāntāḥ sarvā niyama-codanāḥ tad-antā yadi no yogān āvaheyuḥ śramāvahāḥ
7.15.29		yathā vārtādayo hy arthā yogasyārthaṁ na bibhrati anarthāya bhaveyuḥ sma pūrtam iṣṭaṁ tathāsataḥ
7.15.30		yaś citta-vijaye yattaḥ syān niḥsaṅgo ’parigrahaḥ eko vivikta-śaraṇo bhikṣur bhaikṣya-mitāśanaḥ
7.15.31		deśe śucau same rājan saṁsthāpyāsanam ātmanaḥ sthiraṁ sukhaṁ samaṁ tasminn āsītarjv-aṅga om iti
7.15.32-33		prāṇāpānau sannirundhyāt pūra-kumbhaka-recakaiḥ yāvan manas tyajet kāmān sva-nāsāgra-nirīkṣaṇaḥ yato yato niḥsarati manaḥ kāma-hataṁ bhramat tatas tata upāhṛtya hṛdi rundhyāc chanair budhaḥ
7.15.34		evam abhyasyataś cittaṁ kālenālpīyasā yateḥ aniśaṁ tasya nirvāṇaṁ yāty anindhana-vahnivat
7.15.35		kāmādibhir anāviddhaṁ praśāntākhila-vṛtti yat cittaṁ brahma-sukha-spṛṣṭaṁ naivottiṣṭheta karhicit
7.15.36		yaḥ pravrajya gṛhāt pūrvaṁ tri-vargāvapanāt punaḥ yadi seveta tān bhikṣuḥ sa vai vāntāśy apatrapaḥ
7.15.37		yaiḥ sva-dehaḥ smṛto ’nātmā martyo viṭ-kṛmi-bhasmavat ta enam ātmasāt kṛtvā ślāghayanti hy asattamāḥ
7.15.38-39		gṛhasthasya kriyā-tyāgo vrata-tyāgo vaṭor api tapasvino grāma-sevā bhikṣor indriya-lolatā āśramāpasadā hy ete khalv āśrama-viḍambanāḥ deva-māyā-vimūḍhāṁs tān upekṣetānukampayā
7.15.40		ātmānaṁ ced vijānīyāt paraṁ jñāna-dhutāśayaḥ kim icchan kasya vā hetor dehaṁ puṣṇāti lampaṭaḥ
7.15.41		āhuḥ śarīraṁ ratham indriyāṇi hayān abhīṣūn mana indriyeśam vartmāni mātrā dhiṣaṇāṁ ca sūtaṁ sattvaṁ bṛhad bandhuram īśa-sṛṣṭam
7.15.42		akṣaṁ daśa-prāṇam adharma-dharmau cakre ’bhimānaṁ rathinaṁ ca jīvam dhanur hi tasya praṇavaṁ paṭhanti śaraṁ tu jīvaṁ param eva lakṣyam
7.15.43-44		rāgo dveṣaś ca lobhaś ca śoka-mohau bhayaṁ madaḥ māno ’vamāno ’sūyā ca māyā hiṁsā ca matsaraḥ rajaḥ pramādaḥ kṣun-nidrā śatravas tv evam ādayaḥ rajas-tamaḥ-prakṛtayaḥ sattva-prakṛtayaḥ kvacit
7.15.45		yāvan nṛ-kāya-ratham ātma-vaśopakalpaṁ dhatte gariṣṭha-caraṇārcanayā niśātam jñānāsim acyuta-balo dadhad asta-śatruḥ svānanda-tuṣṭa upaśānta idaṁ vijahyāt
7.15.46		nocet pramattam asad-indriya-vāji-sūtā nītvotpathaṁ viṣaya-dasyuṣu nikṣipanti te dasyavaḥ sahaya-sūtam amuṁ tamo ’ndhe saṁsāra-kūpa uru-mṛtyu-bhaye kṣipanti
7.15.47		pravṛttaṁ ca nivṛttaṁ ca dvi-vidhaṁ karma vaidikam āvartate pravṛttena nivṛttenāśnute ’mṛtam
7.15.48-49		hiṁsraṁ dravyamayaṁ kāmyam agni-hotrādy-aśāntidam darśaś ca pūrṇamāsaś ca cāturmāsyaṁ paśuḥ sutaḥ etad iṣṭaṁ pravṛttākhyaṁ hutaṁ prahutam eva ca pūrtaṁ surālayārāma- kūpājīvyādi-lakṣaṇam
7.15.50-51		dravya-sūkṣma-vipākaś ca dhūmo rātrir apakṣayaḥ ayanaṁ dakṣiṇaṁ somo darśa oṣadhi-vīrudhaḥ annaṁ reta iti kṣmeśa pitṛ-yānaṁ punar-bhavaḥ ekaikaśyenānupūrvaṁ bhūtvā bhūtveha jāyate
7.15.52		niṣekādi-śmaśānāntaiḥ saṁskāraiḥ saṁskṛto dvijaḥ indriyeṣu kriyā-yajñān jñāna-dīpeṣu juhvati
7.15.53		indriyāṇi manasy ūrmau vāci vaikārikaṁ manaḥ vācaṁ varṇa-samāmnāye tam oṁkāre svare nyaset oṁkāraṁ bindau nāde taṁ taṁ tu prāṇe mahaty amum
7.15.54		agniḥ sūryo divā prāhṇaḥ śuklo rākottaraṁ sva-rāṭ viśvo ’tha taijasaḥ prājñas turya ātmā samanvayāt
7.15.55		deva-yānam idaṁ prāhur bhūtvā bhūtvānupūrvaśaḥ ātma-yājy upaśāntātmā hy ātma-stho na nivartate
7.15.56		ya ete pitṛ-devānām ayane veda-nirmite śāstreṇa cakṣuṣā veda jana-stho ’pi na muhyati
7.15.57		ādāv ante janānāṁ sad bahir antaḥ parāvaram jñānaṁ jñeyaṁ vaco vācyaṁ tamo jyotis tv ayaṁ svayam
7.15.58		ābādhito ’pi hy ābhāso yathā vastutayā smṛtaḥ durghaṭatvād aindriyakaṁ tadvad artha-vikalpitam
7.15.59		kṣity-ādīnām ihārthānāṁ chāyā na katamāpi hi na saṅghāto vikāro ’pi na pṛthaṅ nānvito mṛṣā
7.15.60		dhātavo ’vayavitvāc ca tan-mātrāvayavair vinā na syur hy asaty avayaviny asann avayavo ’ntataḥ
7.15.61		syāt sādṛśya-bhramas tāvad vikalpe sati vastunaḥ jāgrat-svāpau yathā svapne tathā vidhi-niṣedhatā
7.15.62		bhāvādvaitaṁ kriyādvaitaṁ dravyādvaitaṁ tathātmanaḥ vartayan svānubhūtyeha trīn svapnān dhunute muniḥ
7.15.63		kārya-kāraṇa-vastv-aikya- darśanaṁ paṭa-tantuvat avastutvād vikalpasya bhāvādvaitaṁ tad ucyate
7.15.64		yad brahmaṇi pare sākṣāt sarva-karma-samarpaṇam mano-vāk-tanubhiḥ pārtha kriyādvaitaṁ tad ucyate
7.15.65		ātma-jāyā-sutādīnām anyeṣāṁ sarva-dehinām yat svārtha-kāmayor aikyaṁ dravyādvaitaṁ tad ucyate
7.15.66		yad yasya vāniṣiddhaṁ syād yena yatra yato nṛpa sa teneheta kāryāṇi naro nānyair anāpadi
7.15.67		etair anyaiś ca vedoktair vartamānaḥ sva-karmabhiḥ gṛhe ’py asya gatiṁ yāyād rājaṁs tad-bhakti-bhāṅ naraḥ
7.15.68		yathā hi yūyaṁ nṛpa-deva dustyajād āpad-gaṇād uttaratātmanaḥ prabhoḥ yat-pāda-paṅkeruha-sevayā bhavān ahāraṣīn nirjita-dig-gajaḥ kratūn
7.15.69		ahaṁ purābhavaṁ kaścid gandharva upabarhaṇaḥ nāmnātīte mahā-kalpe gandharvāṇāṁ susammataḥ
7.15.70		rūpa-peśala-mādhurya- saugandhya-priya-darśanaḥ strīṇāṁ priyatamo nityaṁ mattaḥ sva-pura-lampaṭaḥ
7.15.71		ekadā deva-satre tu gandharvāpsarasāṁ gaṇāḥ upahūtā viśva-sṛgbhir hari-gāthopagāyane
7.15.72		ahaṁ ca gāyaṁs tad-vidvān strībhiḥ parivṛto gataḥ jñātvā viśva-sṛjas tan me helanaṁ śepur ojasā yāhi tvaṁ śūdratām āśu naṣṭa-śrīḥ kṛta-helanaḥ
7.15.73		tāvad dāsyām ahaṁ jajñe tatrāpi brahma-vādinām śuśrūṣayānuṣaṅgeṇa prāpto ’haṁ brahma-putratām
7.15.74		dharmas te gṛha-medhīyo varṇitaḥ pāpa-nāśanaḥ gṛhastho yena padavīm añjasā nyāsinām iyāt
7.15.75		yūyaṁ nṛ-loke bata bhūri-bhāgā lokaṁ punānā munayo ’bhiyanti yeṣāṁ gṛhān āvasatīti sākṣād gūḍhaṁ paraṁ brahma manuṣya-liṅgam
7.15.76		sa vā ayaṁ brahma mahad-vimṛgya- kaivalya-nirvāṇa-sukhānubhūtiḥ priyaḥ suhṛd vaḥ khalu mātuleya ātmārhaṇīyo vidhi-kṛd guruś ca
7.15.77		na yasya sākṣād bhava-padmajādibhī rūpaṁ dhiyā vastutayopavarṇitam maunena bhaktyopaśamena pūjitaḥ prasīdatām eṣa sa sātvatāṁ patiḥ
7.15.78		śrī-śuka uvāca iti devarṣiṇā proktaṁ niśamya bharatarṣabhaḥ pūjayām āsa suprītaḥ kṛṣṇaṁ ca prema-vihvalaḥ
7.15.79		kṛṣṇa-pārthāv upāmantrya pūjitaḥ prayayau muniḥ śrutvā kṛṣṇaṁ paraṁ brahma pārthaḥ parama-vismitaḥ
7.15.80		iti dākṣāyaṇīnāṁ te pṛthag vaṁśāḥ prakīrtitāḥ devāsura-manuṣyādyā lokā yatra carācarāḥ


Library Home-Inicio Śrīla Prabhupāda ISKCON Languages-Idiomas English Español Pусский Português English - Español English - Pусский English - Português Español - Pусский Español - Português Pусский - Português Authors-Autores Books-Libros Basics-Básicos Reference-Referenciales Essays-Ensayos Narrative by Ācaryas Narrativos de los Ācaryas Philosophical by Ācaryas Filosóficos de los Ācaryas By Śrīla Prabhupāda De Śrīla Prabhupāda The Great Classics Los grandes Clásicos About Śrīla Prabhupāda Sobre Śrīla Prabhupāda Narrative by Prabhupāda's Disciples Narrativos de discípulos de Śrīla Prabhupāda Philosophical by Prabhupāda's Disciples Filosóficos de discípulos de Śrīla Prabhupāda Magazines-Revistas Websites ISKCON Virtual Temple Templo Virtual de ISKCON Virtual Istagosthi Istagosthi Virtual Vaiṣṇava Calendar Calendário Vaiṣṇava Kṛṣṇa West