Bhaktivedanta Library


10.89.1		śrī-śuka uvāca sarasvatyās taṭe rājann ṛṣayaḥ satram āsata vitarkaḥ samabhūt teṣāṁ triṣv adhīśeṣu ko mahān
10.89.2		tasya jijñāsayā te vai bhṛguṁ brahma-sutaṁ nṛpa taj-jñaptyai preṣayām āsuḥ so ’bhjagād brahmaṇaḥ sabhām
10.89.3		na tasmai prahvaṇaṁ stotraṁ cakre sattva-parīkṣayā tasmai cukrodha bhagavān prajvalan svena tejasā
10.89.4		sa ātmany utthitam manyum ātmajāyātmanā prabhuḥ aśīśamad yathā vahniṁ sva-yonyā vāriṇātma-bhūḥ
10.89.5		tataḥ kailāsam agamat sa taṁ devo maheśvaraḥ parirabdhuṁ samārebha utthāya bhrātaraṁ mudā
10.89.6-7		naicchat tvam asy utpatha-ga iti devaś cukopa ha śūlam udyamya taṁ hantum ārebhe tigma-locanaḥ patitvā pādayor devī sāntvayām āsa taṁ girā atho jagāma vaikuṇṭhaṁ yatra devo janārdanaḥ
10.89.8-9		śayānaṁ śriya utsaṅge padā vakṣasy atāḍayat tata utthāya bhagavān saha lakṣmyā satāṁ gatiḥ sva-talpād avaruhyātha nanāma śirasā munim āha te svāgataṁ brahman niṣīdātrāsane kṣaṇam ajānatām āgatān vaḥ kṣantum arhatha naḥ prabho
10.89.10-11		punīhi saha-lokaṁ māṁ loka-pālāṁś ca mad-gatān pādodakena bhavatas tīrthānāṁ tīrtha-kāriṇā adyāhaṁ bhagavaḻ lakṣmyā āsam ekānta-bhājanam vatsyaty urasi me bhūtir bhavat-pāda-hatāṁhasaḥ
10.89.12		śrī-śuka uvāca evaṁ bruvāṇe vaikuṇṭhe bhṛgus tan-mandrayā girā nirvṛtas tarpitas tūṣṇīṁ bhakty-utkaṇṭho ’śru-locanaḥ
10.89.13		punaś ca satram āvrajya munīnāṁ brahma-vādinām svānubhūtam aśeṣeṇa rājan bhṛgur avarṇayat
10.89.14-17		tan niśamyātha munayo vismitā mukta-saṁśayāḥ bhūyāṁsaṁ śraddadhur viṣṇuṁ yataḥ śāntir yato ’bhayam dharmaḥ sākṣād yato jñānaṁ vairāgyaṁ ca tad-anvitam aiśvaryaṁ cāṣṭadhā yasmād yaśaś cātma-malāpaham munīnāṁ nyasta-daṇḍānāṁ śāntānāṁ sama-cetasām akiñcanānāṁ sādhūnāṁ yam āhuḥ paramāṁ gatim sattvaṁ yasya priyā mūrtir brāhmaṇās tv iṣṭa-devatāḥ bhajanty anāśiṣaḥ śāntā yaṁ vā nipuṇa-buddhayaḥ
10.89.18		tri-vidhākṛtayas tasya rākṣasā asurāḥ surāḥ guṇinyā māyayā sṛṣṭāḥ sattvaṁ tat tīrtha-sādhanam
10.89.19		śrī-śuka uvāca itthaṁ sārasvatā viprā nṛṇām saṁśaya-nuttaye puruṣasya padāmbhoja- sevayā tad-gatiṁ gatāḥ
10.89.20		śrī-sūta uvāca ity etan muni-tanayāsya-padma-gandha pīyūṣaṁ bhava-bhaya-bhit parasya puṁsaḥ su-ślokaṁ śravaṇa-puṭaiḥ pibaty abhīkṣṇam pāntho ’dhva-bhramaṇa-pariśramaṁ jahāti
10.89.21		śrī-śuka uvāca ekadā dvāravatyāṁ tu vipra-patnyāḥ kumārakaḥ jāta-mātro bhuvaṁ spṛṣṭvā mamāra kila bhārata
10.89.22		vipro gṛhītvā mṛtakaṁ rāja-dvāry upadhāya saḥ idaṁ provāca vilapann āturo dīna-mānasaḥ
10.89.23		brahma-dviṣaḥ śaṭha-dhiyo lubdhasya viṣayātmanaḥ kṣatra-bandhoḥ karma-doṣāt pañcatvaṁ me gato ’rbhakaḥ
10.89.24		hiṁsā-vihāraṁ nṛpatiṁ duḥśīlam ajitendriyam prajā bhajantyaḥ sīdanti daridrā nitya-duḥkhitāḥ
10.89.25		evaṁ dvitīyaṁ viprarṣis tṛtīyaṁ tv evam eva ca visṛjya sa nṛpa-dvāri tāṁ gāthāṁ samagāyata
10.89.26-27		tām arjuna upaśrutya karhicit keśavāntike parete navame bāle brāhmaṇaṁ samabhāṣata kiṁ svid brahmaṁs tvan-nivāse iha nāsti dhanur-dharaḥ rājanya-bandhur ete vai brāhmaṇāḥ satram āsate
10.89.28		dhana-dārātmajāpṛktā yatra śocanti brāhmaṇāḥ te vai rājanya-veṣeṇa naṭā jīvanty asum-bharāḥ
10.89.29		ahaṁ prajāḥ vāṁ bhagavan rakṣiṣye dīnayor iha anistīrṇa-pratijño ’gniṁ pravekṣye hata-kalmaṣaḥ
10.89.30-31		śrī-brāhmaṇa uvāca saṅkarṣaṇo vāsudevaḥ pradyumno dhanvināṁ varaḥ aniruddho ’prati-ratho na trātuṁ śaknuvanti yat tat kathaṁ nu bhavān karma duṣkaraṁ jagad-īśvaraiḥ tvaṁ cikīrṣasi bāliśyāt tan na śraddadhmahe vayam
10.89.32		śrī-arjuna uvāca nāhaṁ saṅkarṣaṇo brahman na kṛṣṇaḥ kārṣṇir eva ca ahaṁ vā arjuno nāma gāṇḍīvaṁ yasya vai dhanuḥ
10.89.33		māvamaṁsthā mama brahman vīryaṁ tryambaka-toṣaṇam mṛtyuṁ vijitya pradhane āneṣye te prajāḥ prabho
10.89.34		evaṁ viśrambhito vipraḥ phālgunena parantapa jagāma sva-gṛhaṁ prītaḥ pārtha-vīryaṁ niśāmayan
10.89.35		prasūti-kāla āsanne bhāryāyā dvija-sattamaḥ pāhi pāhi prajāṁ mṛtyor ity āhārjunam āturaḥ
10.89.36		sa upaspṛśya śucy ambho namaskṛtya maheśvaram divyāny astrāṇi saṁsmṛtya sajyaṁ gāṇḍīvam ādade
10.89.37		nyaruṇat sūtikāgāraṁ śarair nānāstra-yojitaiḥ tiryag ūrdhvam adhaḥ pārthaś cakāra śara-pañjaram
10.89.38		tataḥ kumāraḥ sañjāto vipra-patnyā rudan muhuḥ sadyo ’darśanam āpede sa-śarīro vihāyasā
10.89.39		tadāha vipro vijayaṁ vinindan kṛṣṇa-sannidhau mauḍhyaṁ paśyata me yo ’haṁ śraddadhe klība-katthanam
10.89.40		na pradyumno nāniruddho na rāmo na ca keśavaḥ yasya śekuḥ paritrātuṁ ko ’nyas tad-aviteśvaraḥ
10.89.41		dhig arjunaṁ mṛṣā-vādaṁ dhig ātma-ślāghino dhanuḥ daivopasṛṣṭaṁ yo mauḍhyād āninīṣati durmatiḥ
10.89.42		evaṁ śapati viprarṣau vidyām āsthāya phālgunaḥ yayau saṁyamanīm āśu yatrāste bhagavān yamaḥ
10.89.43-44		viprāpatyam acakṣāṇas tata aindrīm agāt purīm āgneyīṁ nairṛtīṁ saumyāṁ vāyavyāṁ vāruṇīm atha rasātalaṁ nāka-pṛṣṭhaṁ dhiṣṇyāny anyāny udāyudhaḥ tato ’labdha-dvija-suto hy anistīrṇa-pratiśrutaḥ agniṁ vivikṣuḥ kṛṣṇena pratyuktaḥ pratiṣedhatā
10.89.45		darśaye dvija-sūnūṁs te māvajñātmānam ātmanā ye te naḥ kīrtiṁ vimalāṁ manuṣyāḥ sthāpayiṣyanti
10.89.46		iti sambhāṣya bhagavān arjunena saheśvaraḥ divyaṁ sva-ratham āsthāya pratīcīṁ diśam āviśat
10.89.47		sapta dvīpān sa-sindhūṁś ca sapta sapta girīn atha lokālokaṁ tathātītya viveśa su-mahat tamaḥ
10.89.48-49		tatrāśvāḥ śaibya-sugrīva- meghapuṣpa-balāhakāḥ tamasi bhraṣṭa-gatayo babhūvur bharatarṣabha tān dṛṣṭvā bhagavān kṛṣṇo mahā-yogeśvareśvaraḥ sahasrāditya-saṅkāśaṁ sva-cakraṁ prāhiṇot puraḥ
10.89.50		tamaḥ su-ghoraṁ gahanaṁ kṛtaṁ mahad vidārayad bhūri-tareṇa rociṣā mano-javaṁ nirviviśe sudarśanaṁ guṇa-cyuto rāma-śaro yathā camūḥ
10.89.51		dvāreṇa cakrānupathena tat tamaḥ paraṁ paraṁ jyotir ananta-pāram samaśnuvānaṁ prasamīkṣya phālgunaḥ pratāḍitākṣo pidadhe ’kṣiṇī ubhe
10.89.52		tataḥ praviṣṭaḥ salilaṁ nabhasvatā balīyasaijad-bṛhad-ūrmi-bhūṣaṇam tatrādbhutaṁ vai bhavanaṁ dyumat-tamaṁ bhrājan-maṇi-stambha-sahasra-śobhitam
10.89.53		tasmin mahā-bhogam anantam adbhutaṁ sahasra-mūrdhanya-phaṇā-maṇi-dyubhiḥ vibhrājamānaṁ dvi-guṇekṣaṇolbaṇaṁ sitācalābhaṁ śiti-kaṇṭha-jihvam
10.89.54-56		dadarśa tad-bhoga-sukhāsanaṁ vibhuṁ mahānubhāvaṁ puruṣottamottamam sāndrāmbudābhaṁ su-piśaṅga-vāsasaṁ prasanna-vaktraṁ rucirāyatekṣaṇam mahā-maṇi-vrāta-kirīṭa-kuṇḍala prabhā-parikṣipta-sahasra-kuntalam pralamba-cārv-aṣṭa-bhujaṁ sa-kaustubhaṁ śrīvatsa-lakṣmaṁ vana-mālayāvṛtam sunanda-nanda-pramukhaiḥ sva-pārṣadaiś cakrādibhir mūrti-dharair nijāyudhaiḥ puṣṭyā śrīyā kīrty-ajayākhilardhibhir niṣevyamānaṁ parameṣṭhināṁ patim
10.89.57		vavanda ātmānam anantam acyuto jiṣṇuś ca tad-darśana-jāta-sādhvasaḥ tāv āha bhūmā parameṣṭhināṁ prabhur beddhāñjalī sa-smitam ūrjayā girā
10.89.58		dvijātmajā me yuvayor didṛkṣuṇā mayopanītā bhuvi dharma-guptaye kalāvatīrṇāv avaner bharāsurān hatveha bhūyas tvarayetam anti me
10.89.59		pūrṇa-kāmāv api yuvāṁ nara-nārāyaṇāv ṛṣī dharmam ācaratāṁ sthityai ṛṣabhau loka-saṅgraham
10.89.60-61		ity ādiṣṭau bhagavatā tau kṛṣṇau parame-ṣṭhinā om ity ānamya bhūmānam ādāya dvija-dārakān nyavartetāṁ svakaṁ dhāma samprahṛṣṭau yathā-gatam viprāya dadatuḥ putrān yathā-rūpaṁ yathā-vayaḥ
10.89.62		niśāmya vaiṣṇavaṁ dhāma pārthaḥ parama-vismitaḥ yat kiñcit pauruṣaṁ puṁsāṁ mene kṛṣṇānukampitam
10.89.63		itīdṛśāny anekāni vīryāṇīha pradarśayan bubhuje viṣayān grāmyān īje cāty-urjitair makhaiḥ
10.89.64		pravavarṣākhilān kāmān prajāsu brāhmaṇādiṣu yathā-kālaṁ yathaivendro bhagavān śraiṣṭhyam āsthitaḥ
10.89.65		hatvā nṛpān adharmiṣṭhān ghāṭayitvārjunādibhiḥ añjasā vartayām āsa dharmaṁ dharma-sutādibhiḥ


Library Home-Inicio Śrīla Prabhupāda ISKCON Languages-Idiomas English Español Pусский Português English - Español English - Pусский English - Português Español - Pусский Español - Português Pусский - Português Authors-Autores Books-Libros Basics-Básicos Reference-Referenciales Essays-Ensayos Narrative by Ācaryas Narrativos de los Ācaryas Philosophical by Ācaryas Filosóficos de los Ācaryas By Śrīla Prabhupāda De Śrīla Prabhupāda The Great Classics Los grandes Clásicos About Śrīla Prabhupāda Sobre Śrīla Prabhupāda Narrative by Prabhupāda's Disciples Narrativos de discípulos de Śrīla Prabhupāda Philosophical by Prabhupāda's Disciples Filosóficos de discípulos de Śrīla Prabhupāda Magazines-Revistas Websites ISKCON Virtual Temple Templo Virtual de ISKCON Virtual Istagosthi Istagosthi Virtual Vaiṣṇava Calendar Calendário Vaiṣṇava Kṛṣṇa West