Bhaktivedanta Library


10.73.1-6		śrī-śuka uvāca ayute dve śatāny aṣṭau niruddhā yudhi nirjitāḥ te nirgatā giridroṇyāṁ malinā mala-vāsasaḥ kṣut-kṣāmāḥ śuṣka-vadanāḥ saṁrodha-parikarśitāḥ dadṛśus te ghana-śyāmaṁ pīta-kauśeya-vāsasam śrīvatsāṅkaṁ catur-bāhuṁ padma-garbhāruṇekṣaṇam cāru-prasanna-vadanaṁ sphuran-makara-kuṇḍalam padma-hastaṁ gadā-śaṅkha rathāṅgair upalakṣitam kirīṭa-hāra-kaṭaka- kaṭi-sūtrāṅgadāñcitam bhrājad-vara-maṇi-grīvaṁ nivītaṁ vana-mālayā pibanta iva cakṣurbhyāṁ lihanta iva jihvayā jighranta iva nāsābhyāṁ rambhanta iva bāhubhiḥ praṇemur hata-pāpmāno mūrdhabhiḥ pādayor hareḥ
10.73.7		kṛṣṇa-sandarśanāhlāda dhvasta-saṁrodhana-klamāḥ praśaśaṁsur hṛṣīkeśaṁ gīrbhiḥ prāñjalayo nṛpāḥ
10.73.8		rājāna ūcuḥ namas te deva-deveśa prapannārti-harāvyaya prapannān pāhi naḥ kṛṣṇa nirviṇṇān ghora-saṁsṛteḥ
10.73.9		nainaṁ nāthānusūyāmo māgadhaṁ madhusūdana anugraho yad bhavato rājñāṁ rājya-cyutir vibho
10.73.10		rājyaiśvarya-madonnaddho na śreyo vindate nṛpaḥ tvan-māyā-mohito ’nityā manyate sampado ’calāḥ
10.73.11		mṛga-tṛṣṇāṁ yathā bālā manyanta udakāśayam evaṁ vaikārikīṁ māyām ayuktā vastu cakṣate
10.73.12-13		vayaṁ purā śrī-mada-naṣṭa-dṛṣṭayo jigīṣayāsyā itaretara-spṛdhaḥ ghnantaḥ prajāḥ svā ati-nirghṛṇāḥ prabho mṛtyuṁ puras tvāvigaṇayya durmadāḥ ta eva kṛṣṇādya gabhīra-raṁhasā durante-vīryeṇa vicālitāḥ śriyaḥ kālena tanvā bhavato ’nukampayā vinaṣṭa-darpāś caraṇau smarāma te
10.73.14		atho na rājyam mṛga-tṛṣṇi-rūpitaṁ dehena śaśvat patatā rujāṁ bhuvā upāsitavyaṁ spṛhayāmahe vibho kriyā-phalaṁ pretya ca karṇa-rocanam
10.73.15		taṁ naḥ samādiśopāyaṁ yena te caraṇābjayoḥ smṛtir yathā na viramed api saṁsaratām iha
10.73.16		kṛṣṇāya vāsudevāya haraye paramātmane praṇata-kleśa-nāśāya govindāya namo namaḥ
10.73.17		śrī-śuka uvāca saṁstūyamāno bhagavān rājabhir mukta-bandhanaiḥ tān āha karuṇas tāta śaraṇyaḥ ślakṣṇayā girā
10.73.18		śrī-bhagavān uvāca adya prabhṛti vo bhūpā mayy ātmany akhileśvare su-dṛḍhā jāyate bhaktir bāḍham āśaṁsitaṁ tathā
10.73.19		diṣṭyā vyavasitaṁ bhūpā bhavanta ṛta-bhāṣiṇaḥ śrīy-aiśvarya-madonnāhaṁ paśya unmādakaṁ nṛṇām
10.73.20		haihayo nahuṣo veṇo rāvaṇo narako ’pare śrī-madād bhraṁśitāḥ sthānād deva-daitya-nareśvarāḥ
10.73.21		bhavanta etad vijñāya dehādy utpādyam anta-vat māṁ yajanto ’dhvarair yuktāḥ prajā dharmeṇa rakṣyatha
10.73.22		santanvantaḥ prajā-tantūn sukhaṁ duḥkhaṁ bhavābhavau prāptaṁ prāptaṁ ca sevanto mac-cittā vicariṣyatha
10.73.23		udāsīnāś ca dehādāv ātmārāmā dhṛta-vratāḥ mayy āveśya manaḥ samyaṅ mām ante brahma yāsyatha
10.73.24		śrī-śuka uvāca ity ādiśya nṛpān kṛṣṇo bhagavān bhuvaneśvaraḥ teṣāṁ nyayuṅkta puruṣān striyo majjana-karmaṇi
10.73.25		saparyāṁ kārayām āsa sahadevena bhārata naradevocitair vastrair bhūṣaṇaiḥ srag-vilepanaiḥ
10.73.26		bhojayitvā varānnena su-snātān samalaṅkṛtān bhogaiś ca vividhair yuktāṁs tāmbūlādyair nṛpocitaiḥ
10.73.27		te pūjitā mukundena rājāno mṛṣṭa-kuṇḍalāḥ virejur mocitāḥ kleśāt prāvṛḍ-ante yathā grahāḥ
10.73.28		rathān sad-aśvān āropya maṇi-kāñcana-bhūṣitān prīṇayya sunṛtair vākyaiḥ sva-deśān pratyayāpayat
10.73.29		ta evaṁ mocitāḥ kṛcchrāt kṛṣṇena su-mahātmanā yayus tam eva dhyāyantaḥ kṛtāni ca jagat-pateḥ
10.73.30		jagaduḥ prakṛtibhyas te mahā-puruṣa-ceṣṭitam yathānvaśāsad bhagavāṁs tathā cakrur atandritāḥ
10.73.31		jarāsandhaṁ ghātayitvā bhīmasenena keśavaḥ pārthābhyāṁ saṁyutaḥ prāyāt sahadevena pūjitaḥ
10.73.32		gatvā te khāṇḍava-prasthaṁ śaṅkhān dadhmur jitārayaḥ harṣayantaḥ sva-suhṛdo durhṛdāṁ cāsukhāvahāḥ
10.73.33		tac chrutvā prīta-manasa indraprastha-nivāsinaḥ menire māgadhaṁ śāntaṁ rājā cāpta-manorathaḥ
10.73.34		abhivandyātha rājānaṁ bhīmārjuna-janārdanāḥ sarvam āśrāvayāṁ cakrur ātmanā yad anuṣṭhitam
10.73.35		niśamya dharma-rājas tat keśavenānukampitam ānandāśru-kalāṁ muñcan premṇā novāca kiñcana


Library Home-Inicio Śrīla Prabhupāda ISKCON Languages-Idiomas English Español Pусский Português English - Español English - Pусский English - Português Español - Pусский Español - Português Pусский - Português Authors-Autores Books-Libros Basics-Básicos Reference-Referenciales Essays-Ensayos Narrative by Ācaryas Narrativos de los Ācaryas Philosophical by Ācaryas Filosóficos de los Ācaryas By Śrīla Prabhupāda De Śrīla Prabhupāda The Great Classics Los grandes Clásicos About Śrīla Prabhupāda Sobre Śrīla Prabhupāda Narrative by Prabhupāda's Disciples Narrativos de discípulos de Śrīla Prabhupāda Philosophical by Prabhupāda's Disciples Filosóficos de discípulos de Śrīla Prabhupāda Magazines-Revistas Websites ISKCON Virtual Temple Templo Virtual de ISKCON Virtual Istagosthi Istagosthi Virtual Vaiṣṇava Calendar Calendário Vaiṣṇava Kṛṣṇa West